Digital Humanities[1] 2014 (“Cumpetenza e qualificaziun ellas scienzas humanas digitalas”) – Clom per contribuziuns (Call for Papers)

Alliance of Digital Humanties Organizations

Hospitau dall‘Universitad da Losanna (UNIL) e l’Ecole Polytechnique Fédérale de Lausanne (EPFL); 8 – 11 da fenadur 2014; http://dh2014.org/; @DH2014Lausanne

—

Scadenza artechels/posters/panels: Venderdis, 1. da november 2013, 23:59 uras (GMT)
Scadenza propostas per luvratoris (workshops): Venderdis, 21 da fevrer 2014, 23:59 uras (GMT)

Clom per contribuziuns

I. Informaziuns generalas

L Alliance of Digital Humanities Organizations (ADHO) envida a suttametter per sia conferenza annuala resumadas, tractond tut ils aspects pusseivels dallas Sciencieas humanas digitalas. Quei cumpeglia denter gl’auter:

• retscherca risguardond sciencias humanas entras medias digitalas, explotaziun da gronds dievers da datas digitalas, studis da software ni da dessegn e modellaziun d’informaziun digitala;
• applicaziuns d’informatica puncto studis literars, linguistics, culturals e historics, inclus literatura electronica, cultura humana publica (public humanities) ed aspects interdisciplinars dallas scienzias modernas;
• arts digitals, architectura, musica, film, teater, medias novas, giugs digitals e camps vischinonts;
• la creaziun e cultivaziun da resursas per las sciencias humanas digitalas
• aspects socials, instituziunals, globals, multilinguals e multiculturals dallas sciencias humanas digitalas
• ed en pli la rolla dallas sciencias humanas digitalas ella pedagogia ed ellas carrieras academicas

Nus beneventein specialmein presentaziuns che tractan lavurs interdisciplinaras e novs svilups sin quei camp, ed encuraschein propostas che sebasan sin la materia dalla conferenza.

Las presentaziuns san cuntener:

• posters (resumadas cun max. 750 plaids)
• artechels cuorts (resumada cun max. 1500 plaids)
• artechels liungs (resumada cun max. 1500 plaids)
• sesidas cun plirs artechels, inclus panels (resumada regulara plus ina survesta cun max. 500 plaids)
• luvratoris e tutorats avon la conferenza (propostas cun max. 1500 plaids)

La scadenza per suttaponer propostas al Comite da programs internaziunal per posters, artechels cuorts ni liungs e per sesidas ei mesanotg (GMT), 1. da november 2013. Presentaders e presentadras vegnan informai sur l’admissiun tochen ils 7 da fevrer 2014. Propostas per luvratoris ni tutorats avon la conferenza ston esser suttaposts tochen mesanotg (GMT) dals 21 da fevrer 2014, l’informaziun sur l’admissiun vegn comunicada tochen ils 17 da mars 2014.

In formular electronic per las propostas vegn ad esser accessibels silla pagina d’intermet dalla conferenza dall’entschatta october 2013: http://dh2014.org/ . Participonts ni correferentas da conferenzas vargadas ein supplicai da duvrar lur datas d’access electonics existents. En cass che vus havesses emblidau vies plaid-clav cussegliein nus da contactar la parsura dil Comite da program, Melissa Terras.

II. Specias da propostas

Las propostas san esser en tschun uisas: (1) presentaziuns da poster (projects); (2) presentaziuns dad artechels cuorts; (3) artechels liungs; (4) sesidas panel cumpleinas ni cun treis artechels; (5) propostas per luvratoris e tutorats avon la conferenza. Sin basa d’ina valetaziun “inter pares” (peer review) ed en vesta da sia incumbensa dad organisar in program variau ed equilibrau, sa il Comite da program acceptar propostas en categorias differentas da quellas proponidas all’entschatta; el vegn normalmein buc ad acceptar pliras propostas dal medem autur ni la medema autura ni gruppa dad autur/as. Artechels e posters astgan vegnir presentai en engles, franzos, tudestg, talian ni spagnol.

1) Presentaziuns poster:

Las propostas poster (500 tochen 750 plaids) san descriver la lavur sur mintga tema dal clom per contribuziuns ni porscher demonstraziuns da projects ni software. Ils posters e las demonstraziuns ston esser fatgs en moda interactiva per dar la pusseivladad als parteciponts da brattar ideas directamein sil plaz. Vitier la sesida engaschada nua ch’ils presentaders vegnan ad explicar lur lavur ed a dar risposta sin damondas vegnan ils posters mussai duront certas uras el cuors dalla conferenza.

2) Artechels cuorts

Propostas per artechels cuorts (750 tochen 1500 plaids) ein adattadas a rapportar sur experiments ni lavurs en cuors, ni per descriver instruments ni software novamein concipi all’entschatta da lur svilup. Questa categoria da presentaziuns sa cuntener tochen tschun artechels cuorts enteifer ina sesida, la lunghezia dallas presentaziuns astga buca surpassar diesch minutas per dar avunda temps allas damondas.

3) Artechels liungs

Propostas per artechels liungs (750 tochen 1500 plaids) ein adattadas a retschercas substanzialas, ventschidas mo aunc buc publicadas; rapports sur dil svilup da novas metodologias ni resursas digitalas significantas; e/ni rigurusas discussiuns teoreticas, speculativas ni criticas. Ils artechels individuals astgan cuzzar 20 minutas per la presentaziun e 10 minutas per las damondas (discussiun).

Propostas arisguard il svilup da novas metodologias dad informatica ni resursas digitalas ston explicar co las metodas vegnan applicadas alla retscherca e/ni alla scolaziun ellas sciencias humanas, tgei che lur impact seigi staus puncto formular e titular damondas arisguard la retscherca, e stuess plinavon cuntener ina valetaziun critica arisguard lur applicaziun allas sciencias humanas. Artechels che focusseschan sin in mied specific ni ina resursa digitala ella sciencia humana ston formular il procediment enviers il problem, seigi quei sin moda tradiziunala seigi quei sin moda basada sin l’informatica, e sto cuntener citats relevonts da funtaunas ella literatura.

4) Sesidas cun differents artechels

Quels consistan dad in panel da 90 minutas cun quater tochen sis oratur/as, ni treis artechels liungs sur ina materia singula. Organisatur/as da panels ston suttametter ina resumada da 750 tochen1500 plaids, descrivond il tema dil panel, co quel vegn organisai, ils nums da tut ils oraturs ed ina declaronza che tut ils oraturs seigien prompts da partecipar alla sesida. Organisatur/as da sesidas dad artechels ston descriver en in pupi da circa 500 plaids la materia dalla sesida, aschuntar las resumadas da 750 tochen 1500 plaids per mintga artechel e declarar che mintga autur seigi prompts da partecipar alla sesida. Artechels suttamess sco part dad ina sesida speciala astgan buca vegnir suttamess individualmein per l’examinaziun en in’autra categoria.

5) Luvratoris e tutorats avon la conferenza

Ils parteciponts e las partecipontas als luvratoris ni tutorats avon la conferenza ston seregistrar per l’entira conferenza ed en pli pagar ina pintga taxa supplementara.

Las propostas ston cuntener las informaziuns seguentas:

• In tetel ed ina cuorta descripziun dil cuntegn ni il material e sia relevonza per la comunitad dallas sciencias humanas digitalas (buca pli che 1500 plaids)
• Informaziuns complettas da contact per tut ils instructers da tutorats ni ils responsabels dals luvratoris, inclus in paragraf cun ina declaronza sur lur interess da retschercas e lur cumpetenzas professiunalas;
• Ina descripziun dil public en mira ed il diember de parteciponts supponiu (sebasond sche pusseivel sin experienzas gia fatgas)
• tut las premissas giavischadas per igl agid tecnic

Propostas per tutorats ston ulteriuramein cuntener:

• ina cuorta descripziun demussond ch’ il cuntegn principal sa vegnir intermediaus enteifer in miez di (ca. 3 uras, cun pausas). Excepziunalmein san tutorats dad in entir di vegni susteni.

Propostas per luvratoris ston cuntener:

• la lunghezia ed il format prevediu dal luvratori (el minimum in miez di; el maximum in e miez di);
• ina proposta per in preventiv (ils luvratoris DH ston sefinanziar independentamein)
  (http://dh2014.org/call-for-paper/practical-information-for-workshops-and-tutorials-organization/)
• en cass ch’il luvratori ha en senn da luvrar cun in agen clom per contribuziuns, in termin da scadenza ed ina data per l’informaziun sur l’admissiun, ed ina gliesta da tut las persunas che fan part dal Comite da program dal luvratori.

III. Informaziuns sur il liug e sur il tema

DH 20143 (“Cumpetenza e qualificaziun en sciencias humanas digitalas”) vegn ad haver liug a Losanna, in marcau pittoresc cun 330’000 habitonts alla riva dil lag da Genevra ella part franzosa dalla Svizra, 60 kilometers el nordost da Genevra, e 225 kilometers el sidvest da Turitg. Situaus en ina regiun da vegnas ei Losanna encunuschents per siu center medieval cun sia catedrala, sias vestas e sia scena culturala vibronta.

Ils envidaders locals ein l’Universitad da Losanna e l’Ecole plytechnique Fédérale de Lausanne. Las duas instituziuns possedan in grond e verdegont campus communabel e dumbran cumplessivamein pli che 20‘000 students e ca. 800 professers. Mintg’instituziun ha siu agen luvratori DH: il DHLAB (http://dhlab.epfl.ch ) ed il LADHUL (http://www.unil.ch/ladhul ). Ellas collaboreschan dapi onns ellas retschercas interdisciplinaras sin quei camp.

IV. Stipendis per giuvens retschercaders/giuvnas retschercadras

L’Alliance of digital Humanities Organizations vegn a far amogna in diember limitau da stipendis per giuvens scienziats che partecipeschan alla conferenza. Las premissas per candidaturas vegnan publicadas silla pagina internet ADHO pli tard quest’onn: http://www.digitalhumanities.org

V. Comite internaziunal da program

• Presidenta : Melissa Terras (EADH)
• Vicepresident : Deb Verhoeven (aaDH)

• John Bradley (EADH)
• Jieh Hsiang (Centernet)
• Jane Hunter (aaDH)
• Aimée Morrison (CSDH/SCHN)
• Dan O’Donnell (CSDH/SCHN)
• Sarah Potvin (Centernet)
• James Smithies (aaDH)
• Takafumi Suzuki (JADH),
• Tomoji Tabata (EADH)
• Toru Tomabechi (JADH)
• Glen Worthey (ACH)
• Vika Zafrin (ACH)
• Presidenta abdiconta: Bethany Nowviskie (ACH)

Bien engraziament per la translaziun ad Anna Pia Maissen, Archiv municipal da Turitg (Stadtarchiv Zürich), Svizra